أيادي مصرية سمرا ليها في التمييز
ممدودة وسط الزئير بتكسر البراويز
سطوع لصوت الجموع شوف مصر تحت الشمس
اّن الاوان ترحلي يا دولة العواجيز
عواجيز شدادا مسعورين
أكلوا بلادنا أكل ..ويشبهوا بعضهم نهم وخسة وشكل
طلع الشباب البديع قلبوا خريفها ربيع
وحققوا المعجزة..صحوا القتيل من القتل
اقتلني!قتلي ما هيعيد دولتك تاني
باكتبي بدمي حياة تانية لأوطاني
دمي ده ولا الربيع ؟الاتنين بلون اخضر
وبابستم من سعادتي ولا احزاني؟
تحوالوا ما تحاولوا ..متشوفوا وطن غيره
سلبتوا دم الوطن وبشيمتوا من خيره
أحلامنا ..بكرانا..أصغر ضحكة على شفة
شوفتوشي صياد يا خلق بيقتله طيره؟
السوس بينخر وسارح تحت اشرافك
فرحان بهم كنت وشايلهم على اكتافك
وأما اهالينا من زرعوا وبنوا وصنعوا
كانوا مداس ليك ولولادك وأحلافك
ويا مصر قام العليا رجعتله أنفاسه
وباس جبين الوطن..مال الوطن باسه
من قبل موته بيوم صحوه اولاده
من كان سببه علته محبته لناسه
الثورة فيضان قديم محبوس ماشفوش زول
الثورة لو جت ماتبنش في كلام او قول
تقلب وتعتل في سرية
تفور في القلب وتنغزل فتلة فتله في ضمير النول
متخافش على مصر يابا ..مصر محروسة
حتى من التهمة دي اللي فينا مدسوسة
ولو انتا ابوها بصحيح وخايف عليها قوي
تركتها ليه بدن بتنخره السوسة؟!
وبيسرقوك يالوطن قدامنا عيني عينك
ينده بقوة الوطن ويقولي:قوم..فينك؟!
ضحكت علينا الكتب..بعدت بنا عنك
لولا ولادنا اللي قاموا يسددوا دينك
لكن خلاص يا وطن صحيت جموع الخلق
قبضوا على الشمس باديهم وقالوا لأ
من المستحيل يفرطوا عقد الوطن تاني
والكدب تاني محال يلبس قناع الحق
بكل حب الحياة خوط في دم اخوك
قول انت مين للي باعوا حلمنا وباعوك.. أهانوك وذلوك
ولعبوا قمار بأحلامك
نيران هتافك تحرر صاحبك الممسوك
يرجع لها صوتها..مصر تعود ملامحهعا
تأخذ مكانها القديم والكون يصالحها
عشرات السنين تسكنوا بالكدب في عروقنا؟
والدنيا متقدمة ومصر مطرحها
كتبتوا أول سطور في صفحة الثورة
وهما علما وخبرا مداورة ومناورة
وقعتوا فرعون هرب من قلب تمثاله
لكن جيوشه ما زالوا يحلموا ببكرة
صباح حقيقي..ودرس جديد قوي في الرفض
أتاري للشمس صوت ..وأتاري للارض نبض
تاني معاكم رجعنا نحب كلمة مصر
تاني معاكم رجعنا نحب ضحكة بعض
مين كان يقول ابننا يطلع بنا من نفق
دي صرخة ولا غنا؟وده دم ولا شفق؟
أتاريها حاجة بسيطة الثورة ياخوانا
مين اللي شافها كدة؟ مين أول اللي بدأ؟
مش دول شبابنا اللي قالوا كرهوا أوطانهم ؟!
ولبسنا توب الحداد وبعدنا اوي عنهم؟!
هما اللي قاموا النهاردة يشعلوا الثورة
ويصنفوا الخلق مين عانهم ومين خانهم
يادي الميدان اللي حضن الفكرة وصهرها
يادي الميدان اللي فتن الخلق وسحرها
يادي الميدان اللي غاب اسمه كتير عنه وصبرها
ما بين عباد عاشقة وعباد كارهة
شباب..طان الميدان أهله وعنوانه
ولا في الميدان نسكافيه ولا كابتشينو
خدوده عرفوا جمال النوم على الأسفلت
والموت عارفهم قوي وهما عارفينه
لا الظلم هين يا ناس ولا الشباب قاصر
مهما حاصرتوا الميدان عمره ما يتحاصر
فكرتني يالميدان بزمان وسحر زمان
كرتني بأغلى أيام في زمن ناصر
شايل حياتك على كفك.. صغير السن
ليل بعد يوم المعاناه وانت مش بتئن
جمل المحامل وانت غض
باتعجب امتى عرفت النضال اسمحلي حاجة تجن
أتاريك جميل يا وطن مازلت وهاتبقى
زال الضباب وانفجرت باعلى صوت لأه
حرضتنا نبتسم ودفعت انت الحساب
وبنبستم بس بسمه طالعة بمشقة
فينك يا صبح الكرامة الا البشر هانوا
واهل مصر الاصيلة اتخانوا واتهانوا
بنشتري العزة تاني والثمن غالي
فتح الوطن للجميع قلبه وأحضانه
الثورة فيض الامل وغنوة الثوار
الليل اذا خانه لونه يتقلب لنهار
ضج الضجيج بالندا اصحى يا فجر الناس
فينك يا صوت الغلابة وضحكة الانفار؟
واحنا وراهم اساتذة خايبة تتعلم
ازاي نحب الوطن وامتى نتكلم
طال الصدأ قلبنا ويأسنا من فتحة
قلب الوطن قبلكم كان خاو ومضلم
أولنا في الجولة. لسة جولة ورا جولة
ده سوس بينخر يابويا في جسد دولة
ايوة الملك اصبح كتابه
انما ابدا لو غفلت عينا لحظة هيقلبوا العملة
لكن خوفي مازال جوه الفؤاد يكبش
خوف اللي كان ساكن شقوق القلب ومعشش
يقوللي مش راح يسيبه
ولسه هيقبوا وهيلاقولهم سكك وببان متتردش
وحاسبوا قوي من الديابة اللي في وسطيكم
والا تبقى الخيانة منكم فيكم
الضحكة عالبق بس الرك عالنيات
فيهم عدوين اشد من اللي حواليكم
