يا آنسه
لوتسمحى لى حضرتك
نِفسى أقول لك كلمتين
وبعدها ليكى القرار
لو تقبلى راح تكونى لى نهار
وان صدِّيتينى
هقدِّم لكْ..إعتذار
هُمَّا كلمتين وبسّ
نِفسى اعبَّر ع اللى جُوَّايا
برغم انُّه ما يتقالش بكلام
زىّ الهيام
يتحسّ بسّ
يشهد عليّا ربِّنا
على إنّ انا
مش جاىّ اعاكسِك
ولّا أجرح ضىّ شمسِك
مش جاىّ أقول لِك
إنتى حلوه ليه قوى كده
ولا جاىّ اقول لِك
إنّى عشت طول العُمر ده
لكنّى عمرى ماشُفت بنت
جميله زيِّك
ولا بنت ليها ضىّ زىّ ضيِّك
ولاجاىّ اقول لِك
إنّ جنِّة ربِّنا
اللى ذكرها فى كتابُه يامؤمنه
عمرى أنا
ماشُفتها إلّا هنا
ف عينيكى دى ...
مش جاىّ اقول لِك كلّ ده..
أنا جاىّ اقول لِك بسّ حاجه
حاجه واحده
جوّا قلبى زىّ آهه مُزمِنه
ياريت
ياريتِك تقبلينى
واحد ..من صُحابك
تكتبينى
سطر ف كتابك
ياريتك تكتبى إسمِك
بيدِّك
فوق جبينى
ياريتك تقبلينى
عصفور..على كِتفِك
أو خطّ..فى كفِّك
ياريتك تدخُلى وتنوَّرى سنينى
ياريتك تِسكُنينى
تسكُنى الوقت اللى فاضل من حياتى
صدقّينى هتِسعدينى
ياريتك تبقى ذاتى
واقول لك :يا أنا
كنت مستنّيكى من مليون سنه
يا نجمه عاليه ف بستان السما
يا سَوسَنه
ياريتك تقبلينى
ضحكايه فى زهرة شبابك
دمعايه فى قلبك
ورْْقاية شجر نايمه على بابك
هزِّة وتر..هيمان فى رحابك
حبّاية مطر بتغنّى ف سحابك
سِبحه..جنب قرآنك..
سِلسلة"ماشاء الله" على صدرك،ف أحضانك
ياريتك تقبلينى
وردايه ف حجابك..
ياريتك تقبلينى
نجمايه ف مدارك
تصبُغى شَعرى بليلِك
تصبُغى ليلِى بنهارك
هوّ ده إحساسى بيكى
هيّه دى هيّه الحقيقه
ياريتك تقبلينى
تِحِنِّى عليّا ـ ولولدقيقه واحده ـ وتُحضُنينى...
ياريت
ياريت تقبلينى.
12/1/2011
